Gipasabot sa Department of Health (DOH) nga walay basihan ang nagkatap nga balita bahin sa emergency lockdown sa nasud tungod sa giingong bag-ong COVID-19 variant nga gitawag og “Cicada.”
Sumala ni DOH Spokesperson Undersecretary Albert Domingo, nga walay kamatuoran ang hungihong nga balita nga adunay emergency lockdown sa nasud tungod sa COVID-19 Cicada variant.
Gipahimangnoan usab nila ang publiko nga likayan ang pagpakatap og pekeng impormasyon ug magsalig lamang sa opisyal nga mga pahibalo.
Walay natala nga kaso sa nasud nga resulta sa Cicada strain (BA.3.2), nga unang nadiskubrihan sa South Africa niadtong Nobyembre 2024 ug kabahin sa Omicron lineage, matod sa World Health Organization.
Sa pagkakaron, natala na ang variant sa 23 ka nasud ug lakip sa kategorya nga COVID variant under monitoring.
Matud ni Domingo, sa kasamtangan wala nagpagawas og pamahayag ang WHO ug uban pang international health bodies kabahin sa maong isyu gumikan niini walay angay kabalak-an.
Dugang pa ni Domingo, ang standard nga precautions ug infection control and prevention measures padayon nga gisunod.
Gipunting usab sa DOH, nga nakatutok ang ahensya sa mga sakit nga may kalabotan sa init nga panahon, samtang giplano ang contingency measures sa nasudnong health system diin subay sa kasamtangang estado sa national energy emergency.