Gikumpirma sa Bureau of Quarantine (BoQ) ubos sa Department of Health (DOH) nga wala pay nadiskubreng bag-ong kaso sa Nipah virus sa nasud hangtod karon.
Matud ni Dr. Roberto Salvador, ang Officer-in-Charge sa BOQ, wala silay namonitor nga mga biyahero nga natakbuyan sa maong virus, ilabi na kadtong gikan sa direct flights sa India diin adunay gitaho nga seasonal outbreak.
Ang katapusang natala nga kaso sa Nipah virus sa Pilipinas nahitabo pa niadtong tuig 2014 didto sa Sultan Kudarat. Aron masiguro nga dili makasulod ang virus, gipatuman sa kagamhanan ang mosunod nga mga lakang sama sa hugot nga gimonitor sa mga kawani ang tanang airport ug pantalan sa tibuok nasud sulod sa 24 oras.
Adunay mga infrared thermal scanner sa mga ports aron daling masusi sa mga nurse ang temperatura sa mga moabot nga pasahero.
Nagpakatap og mga “spotter” sa mga pantalan aron mosusi sa mga biyahero nga nagpakita og mga timailhan sa sakit.
Kini nga mga lakang subay sa direktiba ni Presidente Ferdinand “Bongbong” Marcos Jr. aron malikayan ang outbreak ug maprotektahan ang panglawas sa publiko, ilabi na karon nga panahon usab sa flu season tungod sa mas bugnaw nga klima.