Subling nakatala ang Philippine Institute of Volcanology and Seismology (PHIVOLCS) og laing pyroclastic density current (PDC) o “uson” nga midahili paubos sa mga bakilid nga bahin sa Bulkan Mayon karong adlawng Lunes.
Sumala sa ilang social media post, nakuha sa video ang pagpanaog sa “uson” sa Basud Gully takna alas-1:19 sa kadlawon, Enero 12, pinaagi sa thermal camera sa Upper Lidong Observation Station VMUL; dugang pa sa PHIVOLCS, walay nadugang nga paghubag o paglihok sa yuta sa bulkan, apan nagpabilin gihapon ang Mayon ilalom sa Alert Level 3.
Padayon usab ang pagbuga sa lava dome ug ang pag-agas sa lava sa bulkan, ug base sa tala sa PHIVOLCS, nakarehistro og 133 ka rockfall events ug 37 ka pyroclastic density currents o “uson” sa miaging gabii, samtang niadtong Enero 11 nakatala usab og 526 ka tonelada nga sulfur dioxide flux, ug padayon gihapon nga makita ang banaag sa maong bulkan.