Andam na ang Philippine women’s national football team alang sa sunod nilang duwa batok sa South Korea sa Gold Coast karong muaabot nga Huwebes, human sa 1-0 kapildihan kontra Australia sa ilang unang duwa sa AFC Women’s Asian Cup.
Naka-iskor si Sam Kerr sa ika-14 minuto, apan human niini napugngan sa Filipinas ang dugang nga goal pinaagi sa disiplinadong depensa ug lig-on nga low block.
Bisan og dominante sa bola ang Australia, naglisod kini paglusot sa depensa sa Pilipinas, uban sa maayong performance ni goalkeeper Olivia McDaniel nga nakahimo og daghang importanteng saves, lakip ang pagpugong kang Mary Fowler sa ulahing bahin sa duwa.
Sumala ni coach Mark Torcaso, resulta kini sa kapin usa ka tuig nga seryosong pagpangandam sa team nga karon nagtinguha makasulod pag-usab sa Women’s World Cup.
Ang Filipinas misulod sa torneyo nga ika-41 sa world rankings apan nakapakita og kusog batok sa world No. 15 nga Australia.
Sa Group A, magduwa usab ang South Korea batok sa Iran.
Ang top two sa matag grupo ug duha ka pinakamaayong third-placed teams mopadayon sa knockout stage.
Ang torneyo maghatag og unom ka slots para sa 2027 FIFA Women’s World Cup.