Nagpadayon ang kahuyang sa piso batok sa dolyar gikan kagahapong adlawa Miyerkules, Marso 11, 2026, diin miabot sa P59.17 ang kantidad sa usa ka US dollar.
Ang padayon nga paghinay sa piso giingong may kalabotan sa taas nga presyo sa krudo sa kalibutan tungod sa tensyon sa Middle East, ingon man sa pagpadayon sa taas nga interest rates sa US Federal Reserve nga nagpalig-on sa demand alang sa dolyar.
Bisan pa man sa gamay nga pagkunhod sa inflation sa Pilipinas gikan 4.1% niadtong Enero ngadto sa 3.9% karong Pebrero, nagpabiling taas ang presyo sa pagkaon ug transportasyon nga nakaapekto sa kumpiyansa sa merkado.
Tungod niini, mas mahal ang pag-import sa mga nag-unang baligya ug gilauman nga mosaka pa ang presyo sa mga produkto sa lokal nga merkado.
Apan, nakabenepisyo usab ang mga pamilyang nagdawat og remittances gikan sa abroad, gumikan mas dako ang kantidad sa dolyar ug ubang foreign currencies kung ipadala na kini sa nasud.