Gisiguro ni Roy Vincent Trinidad, tigpamaba sa Philippine Navy alang sa West Philippine Sea, nga walay namonitor nga credible security threat batok sa Pilipinas taliwala sa nagpadayong kaguliyang sa Middle East.
Ang pahayag gihimo human mokalat ang alegasyon nga posibleng mahimong target ang nasod tungod sa presensya sa Enhanced Defense Cooperation Agreement o EDCA sites, ilabi na human sa pag-atake sa Estados Unidos ug Israel batok sa Iran ug sa mga retaliatory actions niini. Matud ni Trinidad, ang mga EDCA site mga pasilidad sa Pilipinas ug dili base militar sa Amerika, ug nagpabiling kontrolado sa gobyerno.
Gidugang pa niya nga kapin 7,000 kilometro ang gilay-on sa Pilipinas gikan sa Iran, nga lapas sa abot sa bisan unsang missile o armas niini. Ang access sa pwersa sa US rotational lamang ug nakatutok sa interoperability, logistics, disaster response ug humanitarian assistance.
Gihangyo sa Navy ang publiko nga magmatngon sa impormasyon sa social media samtang nagpadayon ang militar sa pagpanalipod sa soberanya ug pagmintinar sa kalinaw ug kalig-on sa rehiyon.