Gihimakak sa Philippine Navy nga miyembro sa Philippine Marine Corps (PMC) ang upat gikan sa 18 ka indibidwal nga gipresentar isip mga “bagmen” nga naghatod kuno og P805 bilyon nga kickbacks ngadto kang Presidente Ferdinand Marcos Jr., kanhi Speaker Martin Romualdez, ug kanhi Congressman Zaldy Co.
Sa usa ka pamahayag, giklaro ni Navy spokesperson Captain Marissa Arlene Martinez nga base sa ilang opisyal nga rekord, wala gayod nahimong miyembro sa Navy o PMC ang maong upat ka tawo. Gidugang usab niya nga ang uban sa maong grupo kay “dishonorably discharged” o natingtang sa serbisyo tungod sa dili maayong binuhatan, samtang ang uban kay dugay na nga nagretiro.
Nanawagan ang Philippine Navy sa publiko nga susihon pag-ayo ang kamatuoran sa mga impormasyon nga nadawat aron malikayan ang pagpakaylap og “fake news.” Gipasalig usab sa militar nga magpabilin silang propesyonal ug dili magpadala sa bisan unsang politikanhong isyu.