Personal nga problema ang gitudlong hinungdan sa hinanaling kamatayon sa usa ka 28 anyos nga babaye, human kini miambak o milayat sa tulay sa Impasug-ong Atugan Bridge kagahapong adlawa takna alas 5:00 sa hapon.
Gikumpirma ni Police Major Dominador Orate Jr., hepe sa Impasug-ong Municipal Police Station, ang kamatayon niini, diin nag-atubang matud pa ang biktima og kaugalingong kasinatian busa nahimo niini ang maong butang.
Giila ang biktima nga si Claudine Gantao Putis, dalaga ug residente sa Poblacion, Impasugong.
Kahinumdaman nga nasaksihan sa mga biyahedor sa lugar ang mismong panghitabo, ug nakit-an ang biktima sa maong tulay nga adunay katawag sa telepono ug gilabay sa lugar ang iyang identification card ug kalit kining milayat.
Gisulayan pa og pugong sa mga nakasaksi ang biktima apan ulahi na kini maabtan pa.
Daling miresponde ang kapulisan sa Impasug-ong ug ang Municipal Disaster Risk Reduction and Management Office (MDRRMO) rescue team.
Narekober ang lawas sa biktima banda alas-6:40 na sa gabii. Samtang hugot nga nagdumili paghatag og impormasyon ang pamilya sa biktima.