Nakatakda nga mosaka ang pensyon sa mga miyembro sa Social Security System (SSS) karong tuiga, kauban ang pagpatuman sa micro loan program aron mas mapadali ang pag-access sa kuwarta alang sa adlaw-adlaw nga panginahanglan sa mga miyembro.
Gipataas sa SSS ang ilang reserve fund ngadto sa ₱1 trillion, nga mao ang pinakataas sulod sa 69 ka tuig nga kasaysayan sa ahensya, ug nakarekord usab og dako nga net income.
Tungod niini, masiguro ang padayon nga pagbayad sa pensyon sa hustong kantidad ug sa tukmang oras, bisan wala pataasa ang kontribusyon sa mga miyembro.
Sa umaabot nga Setyembre 2026, makadawat ang retirement ug disability pensioners og dugang nga 10%, samtang ang death ug survivor pensioners makabenepisyo og 5% nga pagtaas.
Aduna pay mosunod nga adjustment sa Setyembre 2027, nga maghatag og kinatibuk-ang pagtaas gikan 16% hangtod 33% depende sa klase sa pensyon.
Maglunsad usab ang SSS og micro pension loan program alang sa mga pensioners nga manghulam og kantidad gikan ₱1,000 hangtod ₱20,000, nga adunay mas ubos nga interes ug mubo nga termino sa pagbayad, aron mapanalipdan ang mga miyembro batok sa scam ug taas nga interes sa informal lending.