Padayon nga gibantayan sa Provincial Disaster Risk Reduction and Management Office kon PDRRMO-Bukidnon ang posibleng epekto sa Bagyong Uwan.
Sa pakighinabi sa Bombo Radyo Malaybalay kang Israel Johan M. Damasco Jr., Hepe sa Bukidnon-PDRRMO, gibutyag niini nga taliwala nga kasamtangang anaa sa “low-risk” kon ubos nga lebel sa peligro ang probinsya, nagpabilin gihapon ang pag-alerto ug kaandam sa mga otoridad, hilabi na sa mga lugar nga sagad nga bahaonon ug landslide prone area sama sa Valencia City, Malaybalay City, Impasug-ong, Maramag, Quezon, Kitaotao, Malitbog, ug Manolo Fortich.
Miluwat usab kini nga nagpahigayon gilayon sila og Pre-Disaster Risk Assessment kon PDRA kauban ang tanang Local Government Units (LGUs) ug mga kauban nga ahensya aron masiguro ang hustong koordinasyon sa mga response cluster.
Gipasabot usab sa PDRRMO nga andam ang tanang LGU alang sa posibleng augmentation response, lakip na ang mobile kitchen, tent, relief goods, ug uban pang kagamitan sa emerhensya.
Gidugang pa niini, nga naka-standby na usab ang mga evacuation center, lakip ang mga personahe, suplay sa pagkaon, ug tambal alang sa mga posibleng maapektuhan sa bagyo.
Gipahimangnoan usab sa PDRRMO ang publiko nga magpabilin nga alerto, mag-monitor sa opisyal nga advisories gikan sa PAGASA ug OCD-Region X, ug likayan ang pagpakatap sa dili kumpirmadong impormasyon aron malikayan ang kahadlok ug kalibog.