Gipahayag ni Presidente Ferdinand “Bongbong” Marcos Jr. nga bisan pa man og dili kontrolado sa nasod ang nagpadayong gubat sa Middle East, gipaniguro sa kagamhanan nga kontrolado niini ang mga lakang aron mapanalipdan ang katawhang Pilipino batok sa negatibong epekto sa maong tensyon.
Tungod sa maong kagubot, gilauman ang usa ka dako ug bug-at nga pagsaka sa presyo sa lana sugod sa sunod semana, diin ginaingon nga mosaka og P7.48 ang matag litro sa gasolina, P17.28 sa diesel, samtang moabot usab sa P32.35 ang pagsaka sa matag litro sa kerosene.
Lakip sa mga lakang nga ginahimo karon mao ang pakig-alayon sa Kongreso aron mahatagan og temporaryong gahum sa pagpakunhod sa excise tax sa mga produkto sa petrolyo.
Giduso usab ang pag-amendar sa balaod aron magamit ang mas barato nga bioethanol, dungan sa pagpagawas og fuel subsidy ug cash transfer alang sa mga sektor nga labing maapektuhan.
Padayun usab ang pagmonitor sa kagamhanan sa mga presyo sa mga paliton aron masiguro nga walay mag abusar sa maong sitwsyon, nihangyo usab kini sa mga negosyante og trader nga dili sabayan ang panahon.