Nanawagan si Presidente Ferdinand Marcos Jr. sa tanang mga Pilipino nga palig-onon ang panaghiusa ug pagtuo dungan sa paghandum sa Semana Santa.
Sa mensahe niini, gidasig sa Presidente ang publiko nga mogahin og igong panahon alang sa pahuway ug pagpamalandong, ug subling pamatud-an ang pagkamaayo ug pagserbisyo sa isigkatawo.
Gihatagan usab niini og gibug-aton ang sakripisyo ni Jesu-Kristo, nga ang tinuod nga kadaugan makaplagan sa sakripisyo ug dili sa gahum.
Gihangyo ni Pres. Marcos ang matag Pilipino nga magpabiling lig-on sa pagtuo ug magtinabangay taliwala sa mga pagsulay aron magkahiusa alang sa mas malambo ug maluluy-on nga “Bagong Pilipinas.”
Gitapos niini ang mensahe pinaagi sa pagpanghinaot og usa ka makahuluganon ug bulahan nga Semana Santa alang sa tanan.