Gimandoan ni Presidente Ferdinand Marcos Jr. ang mga law enforcement agencies nga dakpon si kanhi Ako Bicol Partylist Representative Zaldy Co ug ang 17 pa ka personahel gikan sa DPWH ug Sunwest Corporation. Kini human magpagula ang Office of the Ombudsman og arrest warrant batok sa maong mga indibidwal. Sumala sa Presidente, pormal nang gisang-at sa Ombudsman ang kaso batok kang Co ug sa 17 pang giakusahan, base sa ebidensiyang gisumite sa Independent Commission of Investigation (ICI) ug Department of Public Works and Highways (DPWH).
Matod pa sa Pangulo, klaro ug lig-on ang mga dokumentong nagserbisyo’g basihanan sa pagpasaka sa kaso. Gidugang sa Presidente nga andam na ang mga otoridad sa pagpatuman sa mga arrest warrants. Dakpon ang mga akusado, ipresentar sa korte, ug gisigurong manubag sila sa balaod.
Gipasabot usab sa Pangulo nga walay espesyal nga pagtamod ug walay ipalabi bisan kinsa. Gipunting ni Marcos Jr. nga iyang humanon ang gisugdan niyang paglimpyo batok sa maong anomalya. Nagpasalamat usab siya sa katawhan sa ilang taas nga pagpailub samtang naghulat sa resulta sa imbestigasyon. Matod niya, nagsugod nang namatikdan ang bunga sa paningkamot sa gobyerno aron masiguro nga manubag sa mga nalambigit sa kontrobersiya.