Gipasalig ni Presidente Ferdinand Marcos Jr. nga igo ang suplay sa pagkaon sa nasud ug magpabiling kontrolado ang presyo niini.
Matud sa Presidente, aktibong nakig-alayon ang gobyerno sa mga food suppliers aron maseguro nga matubag ang adlaw-adlaw nga panginahanglanon sa katawhan, dungan sa pagpahibalo nga ang kasamtangang stock sa pagkaon anaa sa saktong lebel.
Gibutyag usab niini nga misugot ang mga pribadong kompanya nga pabilinon ang kasamtangang presyo sa mga produkto sulod sa usa o duha ka bulan samtang padayon ang monitoring sa kagamhanan.
Dungan niini, gimandoan sa Presidente si DTI Secretary Maria Cristina Roque nga palig-onon ang suplay pinaagi sa padayong komunikasyon sa mga manufacturers.
Matod pa ni DTI Secretary Maria Cristina Roque nga sa gihimong inspeksyon sa mga grocery ug manufacturing plants, nasayran nga molungtad pa og kapin sa usa ka bulan ang suplay sa mga basic necessities ug prime commodities sa nasud.
Gisugro usab niini nga padayun ang pagabuhaton nga monitoring sa maong ahensiya.