Giduso sa mga grupo sa mga negosyante ug trabahante si Pangulong Ferdinand Marcos Jr. nga maghimo sa kongkretong aksyon batok sa laganap nga korapsyon sa gobyerno, samtang ilang gisaway ang hinay nga imbestigasyon sa mga nalambigit niini.
Sa usa ka open letter, gipahayag sa mga grupo nga dugay na silang nagpas-an sa kalamboan sa nasud pinaagi sa buhis ug trabaho apan dili na sila manghilom samtang trilyon-trilyong piso ang mawala sa pondo sa nasud. Lakip sa mga mipirma sa menshae mao ang Employers Confederation of the Philippines, Philippine Chamber of Commerce and Industry, Philippine Exporters Confederation Inc., Federation of Free Workers, Sentro ng mga Nagkakaisa at Progresibong Manggagawa, ug Trade Union Congress of the Philippines.
Ilang gipakita nga misaka ang kawalay pagsalig sa publiko sa gobyerno, base sa Pulse Asia survey nga nagpakita nga 97% sa mga Pilipino nagtuo nga laganap ang korapsyon. Nanawagan usab sila sa Pangulo nga ipakita nga dili kini “piling hustisya” kondili sinugdanan sa tinuod nga reporma.
Sa laing bahin, gikabalak-an usab ang posibleng negatibong epekto sa pagdani sa mga investor tungod sa isyu sa kapakyasan sa pag-atubang sa kontrobersiya nga may kalambigitan sa halapad nga korapsyon.
Sa pakighinabi sa Bombo Radyo Mlayabalay ngadto kang Ray Talimio Jr., kanhi myembro sa Oro Chamber ug sa Economic Development Committee sa Regional Development Council – Region X (RDC-X), nga dili lamang kini suliran sa politika kondili usa ka seryosong babag sa pagsalig sa mga potensyal nga foreign investors nga gustong mosulod sa Pilipinas.
Iyang giingon nga ang maong sitwasyon makahatag og negatibong impresyon sa international business climate diin mawala ang transparency sa nasud.