Gimanduan ni Presidente Ferdinand “Bongbong” Marcos Jr. ang higpit nga pagdili sa mga politiko sa pag-apil o pagpakita sa aktwal nga pagpang-apod-apod sa tabang pinansyal o ayuda gikan sa gobyerno.
Kini human pormal nga gipirmahan sa Presidente ang ₱6.793-trilyon nga 2026 national budget kagahapong adlawa, Lunes, ning tuiga, diin iyang gipasiugda nga ang serbisyo sa gobyerno kinahanglan diretsong moabot sa mga benepisyaryo ug malikayan ang gitawag nga patronage politics.
Dungan niini, gipasalig sa Malacañang nga “limpyo” ang maong budget ug walay bisan unsang porma sa ‘pork barrel funds’ nga nakasulod niini.
Matod sa Palasyo, ang matag sentimo sa pondo sa katawhan alang sa tuig 2026 gipahinungod sa klaro ug lehitimong mga programa, aron masiguro nga ang serbisyo moabot sa mga nanginahanglan nga walay kaltas ug walay kulang.