Andam makig-uliay si Pangulong Ferdinand Marcos Jr. sa pamilya Duterte. Gipadayag kini sa Presidente atol sa iyang podcast interview, diin iyang giingon nga dili siya gusto og mga kaaway tungod kay daghan na siya og kalaban mas gusto niya nga adunay panaghigalaay.
Tinguha niini mao ang panaghiusa ug kasabutan sa tanang sektor aron masiguro ang malinawon ug hapsay nga pagdumala sa nasud. Sa pagkakaron, naputol ang maayong relasyon tali sa administrasyon ni Marcos ug sa kampo sa mga Duterte human sa pipila ka kontrobersiya ug panagbangi.
Kahinumduman nga una nang mibulag si Vice President Sara Duterte sa Unity Team human niyang gipadayag ang kakulang sa suporta sa iyang mga baruganan gikan sa administrasyon. Giinsistir sa Pangulo nga ang iyang prioridad mao ang kalinaw ug kalig-on sa nasud aron mu-usbaw ang ekonomiya ug mas daghan pang serbisyo publiko ang mahatag sa mga Pilipino.
Dugang pa niini bisan og dili man sila magkauyon sa tanang polisiya, importante gihapon ang panaghiusa ug panagtinabangay para sa kaayohan sa katawhan.