Naiuli na sa Pilipinas ang patay’ng lawas sa Pinay caregiver nga si Mary Ann De Vera nga namatay sa missile attack sa Tel Aviv, Israel.
Kini pinaagi sa koordinasyon sa Department of Migrant Workers ug uban pang ahensya sa gobyerno aron madala pabalik sa nasud ang patay nga lawas sa biktima ug mahatagan og hustong pagpasidungog sa pamilya.
Si De Vera, usa ka overseas Filipino worker nga nagtrabaho isip caregiver, namatay human maigo sa missile strike samtang gisulayan niining mapanalipdan ug matabangan ang giatiman nga pasyente padulong sa bomb shelter atol sa pag-atake.
Human sa pag-abot sa patay’ng lawas niini sa Pilipinas, nangayo og pribasiya ang pamilya sa biktima samtang nagbangotan sa dakong pagkawala ug gihangyo ang publiko nga respetohon ang kahimtang.
Samtang, nagpadayon usab ang pakigtambayayong sa gobyerno sa Pilipinas ug mga otoridad sa Israel aron masiguro ang suporta ug mga benepisyo alang sa pamilya sa napatay nga OFW.