Patay ang usa ka babayeng residente sa Kitaotao human napaakan og banakon sa Cotabato

Gihaya na sa pamilya ang patay’ng lawas sa usa ka 34 anyos nga babaye nga residente sa Kitaotao, Bukidnon human napaakan og banakon samtang anaa sa suba sa Kulaman Valley, Arakan, Cotabato.

Matud ni Andres Anggong Lavidan, ig-agaw sa biktima, ang namatay giila nga si Jenisa Clambog Mandi, residente sa Purok 7, Barangay Gutalid, Kitaotao, Bukidnon.

Nahitabo ang insidente pasado alas 9 sa buntag kaniadtong Enero 1, 2026, sa dihang ang biktima anaa sa maong suba ug kalit nga napaakan sa banakon.

Human sa insidente, gipaningkamotan pa sa pamilya sa biktima nga dalhon kini sa balay tambalanan apan tungod sa kalay-on sa biyahe nga mikabat og kapin upat ka oras, wala na makaya sa biktima ug nakabsan na kini sa kinabuhi.