Nagpagawas ang Department of Transportation (DOTr) og kamandoan sa temporaryong paghunong sa operasyon sa tanang pampasahero nga barko sa Aleeson Shipping Lines Incorporated, human sa pagka-unlod sa MV Trishia Kerstin 3 sa Basilan.
Sumala kang DOTr Acting Secretary Giovanni Lopez, iyang gisugo ang Maritime Industry Authority (MARINA) ug ang Philippine Coast Guard nga mohimo og maritime safety audit ug inspeksiyon sa tanang barko ug crew sa maong kompanya, ug magsugod og halapad nga imbestigasyon sa nahitabong insidente.
Matod pa ni Lopez, manubag ang tanang responsable, sa shipping company man o sa ahensya sa gobyerno.
Dugang pa niini, nga base sa rekord, 32 na ka maritime incidents ang nalambigit sa Aleeson Shipping sukad niadtong 2019, nga usa sa mga importanteng anggulo sa imbestigasyon.
Samtang nagpadayon ang imbestigasyon, nangayo usab ang DOTr og maritime audit sa tibuok domestic fleet sa Pilipinas.
Nag-andam usab ang MARINA sa pag-isyu og special permits sa ubang shipping lines aron dili maputol ang serbisyo sa mga ruta nga apektado.
Gumikan nga ang Aleeson Shipping lamang ang regular nga nagabiyahe sa pipila ka lugar sa Zamboanga Peninsula, gisiguro sa gobyerno ang libreng sakay sa Philippine Coast Guard alang sa mga pasahero nga maapektuhan.
Sa pinakabag-ong update, gikumpirma ni Lopez nga 317 ka pasahero ug 27 ka tripulante ang sakay sa MV Trishia Kerstin 3.
Samtang, 18 ang namatay ug 10 pa ang padayon nga gipangita, apil ang kapitan sa barko.