Gipirmahan ni Presidente Ferdinand Marcos Jr. ang usa ka balaod nga nag-amyenda sa “Motorcycle Crime Prevention Act” aron mapauswag ang pagpatuman sa balaod ug mapalambo ang responsableng pagpanag-iya sa mga motorsiklo.
Gipirmahan ang balaod ni Marcos niadtong Mayo 9, ug giusab niini ang Section 4 sa Republic Act No. 11235, diin gikinahanglan na karon ang bag-ong tag-iya nga ibalhin ang rehistro sa ilang motorsiklo sulod sa 20 ka working days, inay nga 5 ka adlaw nga anaa sa orihinal nga bersyon.
Gipamub-an usab sa bag-ong balaod ang mga silot.
Gikan sa silot nga pagkabilanggo o multa nga PhP20,000 hangtod PhP50,000, gipamub-an kini ngadto sa multa nga dili molapas sa PhP5,000. Wala na usab bili ang pagkumpiska sa sakyanan base lamang sa kakulangan sa pag transfer sa rehistro.
Gipahimangnoan ang mga dealers nga kinahanglan ireport ang tanang repossession sa katungdanan. Gipahugtan usab sa Section 5 ang mga sukbanan sa plate number diin kinahanglan nga kini tukma ang gidak-on, mabasa, ug color-coded.
Ang drayber nga walay plate number karon multahon lang og hangtod PhP5,000 inay nga ang karaang multa nga PhP50,000 hangtod PhP100,000 o pagkabilanggo. Gipasabot sa balaod nga wala’y kumpiska sa higayong ang tag-iya makapakita og rehistro ug walay kalapasan sa pagkawala.
Sa Section 11, gipamub-an ang multa sa wala mag-report sa nawagtang nga plate number gikan sa PhP50,000 ngadto sa flat nga PhP5,000.
Samtang sa Section 12, gipahamtang ang silot nga 6 ka buwan hangtod 2 ka tuig nga pagkabilanggo ug multa nga hangtod PhP10,000 batok sa mga magtamper, mag-abuso o maling paggamit sa plate number.Mag-atubang usab og silot ang mamaligya o mupalit og plate number nga peke, giusab, gi-forged, o gi-imitate.