Mibyahe sa Abu Dhabi, United Arab Emirates si Pangulong Ferdinand Marcos Jr. alang sa usa ka adlaw nga working visit, base sa imbitasyon sa UAE President Sheikh Mohamed Bin Zayed Al Nahyan.
Gitagbo siya sa UAE Minister of State, Saeed Al Hajeri, ug mitambong siya sa Abu Dhabi Sustainability Week, diin gihisgutan ang mga isyu sa enerhiya, pagkaon, tubig, panalapi, ug pagpanalipod sa kalikupan.
Lakip sa mga tuyo sa pagbisita mao ang pagpirma sa duha ka importanteng kasabutan: ang Comprehensive Economic Partnership Agreement (CEPA) ug ang kasabutan sa kooperasyong pang-depensa, nga gilauman nga mopalapad sa kalakalan ug lig-onon ang koneksyon panseguridad sa duha ka nasud.
Nakigpulong usab ang Pangulo sa mga negosyante ug nakig-uban sa mga Filipino sa UAE, nga gibanabana og 900,000 ka Pilipino ang nagpuyo didto.
Gipahibalo usab ni Philippine Ambassador sa UAE Alfonso Ver nga pinaagi sa CEPA, mas mapalapdan sa Pilipinas ang access sa Gulf Cooperation Council (GCC) Market, nga naglakip sa Bahrain, Kuwait, Oman, Qatar, Saudi Arabia, ug UAE.
Giila sa Ambassador nga ang Pilipinas usa sa mga unang nasud nga gihatagan sa maong kasabutan, nga nagtimaan sa mas maayo nga momentum sa bilateral relations sa duha ka nasud.