Nakakaplag og diyamante nga mitimbang og 2.79 carats ang usa ka pamilya gikan sa Oklahoma nga nagselebrar sa adlawng natawhan sa Crater of Diamonds State Park sa Arkansas.
Sumala ni Raynae Madison, gikan pa sila sa Cookson, Oklahoma aron sa pagselebrar sa adlawng natawhan sa iyang pag-umangkon.
Nagdala sila og beach digging kit ug sand sifting tools nga ilang gipalit sa usa ka dollar store.
Ang Crater of Diamonds Park mao ra ang nag-inusarang diamond mine sa tibuok kalibutan nga abli sa publiko, diin ang mga bisita makahukay ug mahimong ila ang bisan unsang diyamante nga ilang makit-an.
Nagsugod ang pamilya sa pagsala duol sa Prospector Trailhead sa amihanang bahin sa parke. Human masala ang pipila ka balde nga balas, nakabantay sila og usa ka sinaw ug taas nga bato.
Matud ni Madison, nga sa sinugdan dili siya sigurado kung unsa kini ug natuo nga sobra kini kadako para mahimong diyamante.
Ilang gidala ang bato sa Diamond Discovery Center sa parke, diin gikumpirma sa mga eksperto nga kini usa ka 2.79-carat brown diamond.
Giklaro ni Emma O’Neal, usa ka interpreter sa parke, nga ang mga brown diamond sa Crater naporma tungod sa proseso nga gitawag og plastic deformation, nga nagmugna og structural defects sa dihang nagalihok ang diyamante sa magma.
Kini nga mga defects nagre-reflect og pula ug berde nga kahayag, nga naghiusa aron mahimong brown ang kolor sa diyamante.
Gingalanan ni Madison ang diyamante nga William Diamond isip pasidungog sa iyang pag-umangkon nga nagsaulog sa iyang adlaw nga natawhan.
Sumala sa parke, ang William Diamond mao ang ikatulong labing dako nga diyamante nga nadeskubre sa parke karong tuiga.