Nagpasaka na ug kasong murder ang pamilya ni Rosalinda Pagaora batok sa iyang live-in partner nga nailhan nga si Julius Solitario, human kini giingong responsable sa brutal nga pagpatay kaniya.
Base sa imbestigasyon sa Kadingilan Municipal Police Station, giangkon mismo niini nga selos ang motibo sa krimen tungod sa iyang pagduda nga adunay laing relasyon si Rosalinda sa ilang silingan.
Sa eksklusibong pakighinabi sa Bombo Radyo Malaybalay, atol sa programang Bombohanay sa Udto, gibutyag ni PCPT Larry T. Malhin, hepe sa Kadingilan Police, nga kadlawon niadtong Lunes, gibundak sa suspetsado ang kasuko pinaagi sapag dunggab sa iyang kapuyo sa nagkadaiyang parte sa lawas samtang hinanok ang katulog niini hinungdan sa hinanaling kamatayon.
Gawas sa selos, migawas sa imbistigasyon sa kapulisan nga naggamit og shabu ang suspetsado sa wala pa mahitabo ang krimen.Kasamtangan, balhog karon sa Kadingilan Police Station ang suspetsado samtang naningkamot ang pamilya sa biktima nga makab-ot ang hustisya para kang Rosalinda.