Gibutyag ni Baguio City Mayor Benjamin Magalong nga dili buot sa pamilya sa kanhing DPWH Undersecretary Maria Catalina Cabral nga ipailawom sa autopsy ang patayng lawas niini.
Sumala sa alkalde, kini usa ka desisyon nga gihimo sa tibuok pamilya. Kini supak sa nauna nang gi-report sa Department of Interior and Local Government (DILG) nga nag-ingon nga ang mga lawas sa namatay nga undersecretary gipailawom na sa autopsy.
Matud ni Magalong, nga kaniadto usab nagserbisyo isip nagdumala sa Criminal Investigation and Detection Group, mas maayo nga ipailawom sa autopsy ang lawas sa namatay nga opisyal, ilabi na nga kadudahan ang insidente sa kamatayon niini.
Gani, nagpabilin nga misteryo kung nagpakamatay ba ang kanhing opisyal o adunay foul play sa iyang pagkamatay human makaplagan ang lawas sa usa ka pangpang sa lungsod sa Tuba, Benguet kagabii (Disyembre 18).
Gikumpirma usab kini ni Cesar Cabral, bana sa kanhing DPWH Undersecretary Catalina Cabral, nga mipirma ang ilang pamilya og waiver aron dili na ipailawaon sa autopsy ang iyang asawa.
Matud niini, nagtuo ang pamilya nga aksidente ang hinungdan sa pagkamatay sa opisyal, ug ilang pangayo na lang karon mao nga madala na ang patayng lawas ni Cabral pauli sa Manila.
Sa pagkakaron, miapela na usab ang Independent Commission for Infrastructure nga buhaton ang usa ka lawom nga imbestigasyon aron masuta kung adunay foul play sa maong insidente.
Samtang ang driver ni Cabral nga si Ricardo Munos Hernandez nagpabilin sa custody sa mga otoridad, diin giisip sa nga usa sa paimbestigahan gumikan gituohan kini nga katapusang nakakita kang Cabral sa wala pa makabsi sa hinanaling kinabuhi.