Pagtangtang sa mga ngalan ug hulagway sa mga pulitiko sa mga proyekto sa gobyerno, gimando sa DILG

Gimando sa Department of the Interior and Local Government (DILG) ang estriktong pagpatuman sa Anti-Epal policy sa tibuok nasud.

Ubos niini, kinahanglang tangtangon dayon ang mga ngalan ug hulagway sa mga politiko sa tanang mga proyekto, programa, kalihokan ug sa mga kabtangan sa gobyerno.

Ang maong mando alang sa tanang lokal nga kagamhanan (LGU) ug mga opisina sa DILG sa tibuok nasud sumala sa memorandum nga gipagawas sa ahensya.

Gihatagan og gibug-aton ni SILG Jonvic Remulla nga ang mga proyekto sa gobyerno gibayran sa katawhan pinaagi sa buhis, busa dili kini angay gamiton alang sa personal nga promosyon.

Tungod niini, gidasig ni Remulla ang publiko sa pag-report sa bisan kinsa nga makit-an nga molapas sa maong Anti-Epal Policy.