Gisugdan na og tuon sa Senado ang usa sa mga sugyot nga suspendihon o hunungon ang sweldo ni Senator Ronald “Bato” dela Rosa.
Matud ni Senate President pro-tempore Ping Lacson, dunay giduso nga solusyon ang Senado kon unsaon pagdumala ang kaso ni Sen. Dela Rosa, kinsa wala na mipakita sa sukad pa niadtong Nobyembre 10, 2025.
Saysay pa ni Sen. Lacson nga usa sa mga rekomendasyon mao ang pagpahunong sa sweldo ni Sen. Bato, apan kinahanglan pa kini nga tun-an og maayo tungod kay sakop sila sa Civil Service Law. Posible usab nga dili uyon sa balaod ang dili pagpasweldo sa usa ka senador kon walay lig-on nga basehan.
Matud pa niini, mahimong basihan sa himuong lakang batok kang Dela Rosa kon duna nay mapasaka nga reklamo batok sa senador ngadto sa Ethics Committee.
Nasayran nga nakigpulong na si kanhi Senator Antonio Trillanes IV nilang Senate President Tito Sotto ug Lacson, diin plano sa kanhi magbabalaod nga mag file og ethics complaint batok kang Dela Rosa karong Marso.
Giklaro ni Sen. Lacson nga dili muakip sa rekomendasyon nga silotan si Sen. Bato tungod kay wala siyay “moral authority” sa pagbuhat niini, sanglit siya mismo nakasinati man usab sa susamang sitwasyon kaniadto.