Pinaagi sa paghatag ug importansya sa mga indibidwal nga gaagi ug kalisdanan sa kinabuhi og sa kaugalingon, gaisaulog ang mental health awareness month ning bulan, Mayo 2025.
Sa pakighinabi sa Bombo Radyo Malaybalay, kang Charmaine Chu, Psychologist, gisaysay niini nga sa daghang mga tawo, ang stress usa sa pinakadako nga hinungdan sa pisikal ug mental nga problema.
Gikan sa mga stressor sa trabaho, pamilya, ug uban pang personal nga mga hagit, daghang mga indibidwal ang nagatubang sa daily pressure nga nagdala sa pagka-kapoy ug kalibog.
Samtang, sumala ni Chu, ang stress, usa ka natural nga reaksyon sa tawo.
Dugang pa sa eksperto, nga ang dugay nga exposure sa stress makahatag og problema sa kasingkasing, immune system, ug mental health.
Giawhag usab ni Chu, nga dili mayo mag-invalidate og ginabati sa mga tawo mahitungod lahi-lahi og tolerance sa stress ang matag indibidwal.
Giawhag usab sa psychologist ang mga tawo nga gabati sa kalisod nga mangita og suporta gikan sa mga tawo nga gisaligan niini kon maglisod sa pagdala sa stress.
Usa sa mga pamaagi mao ang pag-apil sa mga community support groups, pagstorya sa pamilya o higala, ug pagsugod og therapy.