Padayon gihapon ang pagpanghatag sa Department of Social Welfare and Development (DSWD) sa medical ug burial assistance sa katawhan, bisan taliwala sa election period. Gibutyag ni Rutchelle Galia, spokesperson sa DSWD Field Office X, nga wala kini gihunong tungod kay daghan ang nanginahanglan sa maong tabang, ug gikonsiderar kini nga exception sa election ban sa Commission on Elections (COMELEC).
Gipasabot ni Galia nga legal ug subay sa balaod ang pagpadayon sa maong ayuda sa ginagmay nga sektor, ilabina kay kini naghatag og serbisyo sa mga indibidwal nga adunay emerhensya sama sa panginahanglan og tambal o tabang sa lubong. Sumala pa, gitugotan sa COMELEC ang pagpadayon sa maong assistance tungod sa urgency ug humanitarian nature sa mga kaso.
Gidugang pa ni Galia nga ang mandato lang sa COMELEC mao ang paghunong sa uban nga klase sa ayuda sulod sa 10 ka adlaw una ang adlaw sa eleksyon. Apan ang mga tabang nga adunay direktang kalambigitan sa panglawas ug krisis sa pamilya, sama sa medical ug burial assistance, wala gilakip sa temporaryong pagpahunong. Nagpabilin ang DSWD nga abri sa mga aplikante nga kwalipikado ug nanginahanglan sa ilang serbisyo, ug gi-awhag ang publiko nga mokonsulta o moduol sa mga social worker sa ilang lugar aron masayran ang proseso sa aplikasyon.