Gituohang isyu sa yuta ang hinungdan sa pagpamusil-patay kang Richard Calo Rama, 48 anyos, Purok Chairman sa Purok-4A, Barangay Aglayan, Malaybalay City, nga nahitabo pasado alas 9:20 sa gabii sa milabayng adlaw daplin sa Sayre Highway.
Sa pakighinabi sa Bombo Radyo Malaybalay, gipadayag ni PLTCOL Joepet B. Paglinawan, Chief of Police sa Malaybalay CPS, nga ang biktima ug ang iyang asawa sakay sa motorsiklo pauli human nagtan-aw og basketball sa usa ka okasyon sa maong barangay, dihang gisundan sila sa duha ka motorsiklo ug gipusil sa wala pa mailhing mga suspek.
Nakaangkon og mga igo sa bala sa dughan ug kilid si Rama nga maoy hinungdan sa iyang kamatayon, samtang nasamdan usab ang iyang asawa nga si Trexie Mae Del Campo Regacho, 41 anyos, nga karon anaa na sa luwas nga kahimtangan ug nagpaalim sa usa ka balay-tambalanan.
Base sa inisyal nga imbestigasyon, giila nga posible motibo ang panagbangi sa yuta, ilabina nga benepisyaryo sa yuta pinaagi sa Department of Agrarian Reform ang biktima ug nalambigit sa miaging mga kalihukan sa re-installation sa yuta sa lugar.
Naa na usab giila ang kapulisan nga person of interest ug padayon ang imbestigasyon aron masiguro ang pagdakop sa responsable sa krimen.