Aduna nay gitumbok nga person of interest ang kapulisan nga adunay kalabotan sa pagpamusil-patay kang Niruh Kyle Antatico, 40 anyos, kanhi legal researcher sa National Irrigation Administration (NIA) Region 10, nga gipusil sa duha ka riding-in-tandem samtang nagmaneho sa iyang sakyanan sa Barangay Patag, Cagayan de Oro City niadtong Oktubre 10, 2025.
Si Antatico, nailhan pinaagi sa pagbutyag ug pagtingot kabahin sa mga alegasyon sa korapsyon ug anomalya sa mga proyekto sa NIA-10 pinaagi sa social media, ug gikaingon nga nakadawat kini og mga hulga sa kamatayon sukad pa sa miaging tuig.
Matud ni Police Major Joann Navarro, tigpamaba sa PRO-10, nga naporma na ang Special Investigation Task Group (SITG Antatico) ug aduna nay person of interest, apan dili matud pa ipadayag ang detalye samtang padayon ang pagkuha og dugang ebidensiya.
Gibutyag usab ni PMaj. Navarro, nga adunay P100,000 ganti alang sa makahatag og kasayuran kabahin sa mga responsable. Â