Gibatikos ang Chinese Embassy sa pipila ka mga senador tungod sa pagpasa sa Senate Resolution No. 256 nga nagkondena sa mga pahayag sa embahada batok sa mga opisyal ug institusyon sa Pilipinas.
Sumala sa Chinese Embassy, nga kini usa ka political stunt ug kulang sa pagsabot sa diplomasya ang mga senador.
Partikular nga giatake sa embahada ang suporta sa pipila ka mambabalaod kang Philippine Coast Guard spokesperson Commodore Jay Tarriela, nga gilangkob sa resolusyon.
Matud sa embahada nga kon buhaton kini sa usa ka langyaw nga opisyal batok sa Pangulo o simbolo sa nasud, mahimong dakong isyu usab kini.
Gibarugan ni Senator Erwin Tulfo, nga adunay katungod ang Senado nga magpagawas og resolusyon ug kini angay respetohon sa embahada sumala sa Vienna Convention on Diplomatic Relations of 1961.
Matud niya nga walay sayup sa gibuhat ni Tarriela gumikan gipatuman lang niini ang iyang katungdanan sa Coast Guard ug adunay katungod sa freedom of speech.
Gibatikos usab ni Senate President Vicente “Tito” Sotto III ang embahada nga nagtinguha nga pahilumon ang Senado samtang ginatawag silang ignorante ug nagpakarong-ingon.
Alang ni Senator Kiko Pangilinan, ang bastos nga pagtubag sa embahada usa ka paglapas sa Vienna Convention ug nagpakita nga wala girespeto sa China ang soberanya sa Pilipinas.
Padayon ang panawagan sa mga senador sa Department of Foreign Affairs nga buhaton ang angay nga lakang aron maprotektahan ang dignidad sa nasud ug masiguro nga ang koneksyon sa ubang nasud masunod sa internasyonal nga balaod ug prinsipyo.