Sugdan na sa House Committee on Justice ang pagdungog sa upat ka verified impeachment complaints batok kang Vice President Sara Duterte karong adlawa, Lunes, Marso 2, 2026.
Sumala kang Batangas Rep. Gerville “Jinky Bitrics” Luistro, chair sa komite, ang pagdungog magpadayon gikan Marso 2 hangtod 4, diin tutukan ang pagsusi kung sufficient in form ug sufficient in substance ang mga reklamo.
Gipasabot ni Luistro nga gamiton sa komite ang parehas nga proseso ug sukdanan nga gigamit sa nauna nga mga reklamo batok kang Pangulo Ferdinand Marcos Jr., nga na-dismiss niadtong miaging tuig.
Ang mga nag-unang basehan sa impeachment mao ang alegasyon sa sayup nga paggamit sa P612.5 milyon nga confidential funds sa OVP ug DepEd, ingon man ang mga paglapas sa Konstitusyon sama sa graft, pagpanuhol, ug dili mapasabot nga mga kabtangan.
Apil usab sa mga reklamo ang betrayal of public trust tungod sa dili pag-ila sa oversight sa Kongreso, ug ang mga giingong pagpanghulga sa kinabuhi nila Pangulo Ferdinand Marcos Jr., First Lady Liza Araneta-Marcos, ug kanhing Speaker Martin Romualdez.
Sumala pa kang Luistro, hatagan og higayon ang Bise Presidente nga motubag sa mga akusasyon isip bahin sa iyang katungod sa due process.