Nabahin ang reaksyon karon sa usa ka negosyante ug mag-uuma kabahin sa pagbukas sa dalan sa Sitio Kipolot, Palacapao, Quezon, Bukidnon.
Sa eksklusibong pakighinabi sa Bombo Radyo Malaybalay kang Erlinda Paring, usa ka mag-uuma ug mamaligyaay sa lungsod sa Quezon, gipadayag niini nga adunay kalipay nga gibati ug kaguol alang sa posibleng pagkunhod sa kita sa paninda human sa pagbukas sa bag-ong dalan o detour road.
Matud ni Paring, isip usa ka negosyante, aduna kini kabalaka nga mahimong maminusan ang kinitaan tungod padayon na ang byahe sa mga sakyanan ug mga byahedor.
Apan giila niini nga mas dako ang epekto sa kaniadto pagsirado sa dalan ngadto sa dagkong negosyante ug mag-uuma, hilabi na kadtong nagsalig sa hapsay nga pagbyahe sa mga produkto gikan ug paingon sa lalawigan.
Matud pa niini, dako ang alkansi nga naaguman tungod sa kalisod sa pagpasulod ug pagpagawas sa mga produkto, hinungdan nga naapektuhan usab ang supply ug presyo sa merkado.
Bisan pa sa mga kabalaka, gibutyag ni Paring nga nabawi kini sa kalipay ug pagsabot sa kaayohan nga dala sa pagbukas sa maong dalan gumikan gihunahuna niini ang dakong kalisdanan nga nasinati sa mga byahedor kaniadto, hilabi na kadtong nagbiyahe uban ang mga bata.