Giklaro sa Malacañang nga wala pa mahisguti ni Presidente Ferdinand Marcos Jr. ug sa iyang gabinete ang posibilidad nga mobalik ang Pilipinas sa International Criminal Court (ICC). Sumala ni Palace Press Office Undersecretary Claire Castro, wala pa’y direktiba o pamahayag ang Pangulo kalabot niini bisan pa sa mga nagpadayong panawagan.
Gihimakak usab sa Palasyo ang mga pasangil nga “gisakripisyo” sa administrasyon ang mga Pilipino ngadto sa langyaw nga korte. Matod ni Castro, mahimong husayon ang mga kaso sa lokal nga hukmanan, apan adunay mga mekanismo ug balaod nga nagtugot sa pakig-alayon sa ICC kon gikinahanglan, lakip na ang pagsurender sa mga akusado.
Nanawagan usab ang Palasyo sa mga dumadapig ni Senator Ronald “Bato” dela Rosa ug Senator Bong Go nga magpabiling kalmado ug respetuhon ang legal nga proseso kon ugaling sirbihan sila og warrant of arrest. Gipaniguro sa Malacañang nga tinguha niini ang hustisya alang sa tanan, ilabi na sa mga biktima sa extrajudicial killings.