Gipahibalo sa Bangko Sentral ng Pilipinas kon BSP nga suspendido sa pagkakaron ang pagbaligya sa Kaamulan Festival Commemorative Coin, nga kabahin sa “Pista sa Pilipinas” Commemorative Coin Series.
Sumala sa BSP, ang maong sensilyo gilusad isip pagpasidungog sa nagkalain-laing pista sa nasud, lakip ang Kaamulan Festival nga ginasaulog sa Bukidnon.
Kini naghulagway sa dato nga kultura ug panaghiusa sa pito ka lumad nga tribu sa maong probinsya.
Gipasabot sa BSP nga ang suspensyon sa baligya usa ka lakang aron ma-manage ang distribusyon sa commemorative coins ug masiguro ang patas nga pag-apod-apod niini sa publiko, hilabi na tungod sa taas nga interes ug demand gikan sa mga kolektor ug katawhan.
Samtang wala pa tukma nga petsa nga gipahibalo kung kanus-a ipadayun pagbaligya ang maong sensilyo, apan gisaad sa BSP nga magpagawas kini og dugang pahibalo sa higayon nga kini magamit na pag-usab.
Giawhag usab ang publiko nga magpabiling alerto sa opisyal nga mga anunsyo sa BSP alang sa dugang impormasyon ug updates kalabot sa commemorative coin series ug uban pang programa sa bangko sentral.