Gikatakda sa Commission on Elections nga ang pagbahin sa Barangay Casisang ngadto sa Upper ug Lower Casisang sa Malaybalay City, Bukidnon magdepende sa resulta sa plebisito sa mga botante.
Sa pakighinabi sa Bombo Radyo Malaybalay kang Atty. Danilo N. Dividina, Election Officer sa COMELEC-Malaybalay. Gipasabot niini nga gikinahanglan una ang city ordinance ug pagtuman sa population ug territory requirements ubos sa Local Government Code, ilabi na nga lapas na sa 15,000 ang rehistradong botante sa Casisang.
Human niini, ang COMELEC mopahigayon og plebisito aron mangayo og pinal nga desisyon sa katawhan kon mouyon ba sila sa division.
Giduso ang sugyot ni Konsehal Rendon Sanggalang aron mas episyente ang paghatag serbisyo publiko ug mas matutukan ang panginahanglan sa komunidad.
Samtang niini, nagpahayag og katingala si Barangay Captain Gregorio Jaroy nga wala siya mahibalo sa ordinansa sa wala pa kini giduso, ug nanawagan og konsultasyon sa mga residente aron malikayan ang kalibog ug kabalaka sa komunidad.