Patay ang usa ka lalaki human gitigbas sa iyang duha ka uyuan sa Sitio Intabas, Barangay La Fortuna, Impasugong, Bukidnon, kagahapon sa hapon. Sumala sa report, panaglalis samtang nag-inom ang hinungdan sa maong krimen.
Sa pakighinabi sa Bombo Radyo Malaybalay kang P/Maj. Dominador V. Orate, Chief of Police sa Impasugong MPS, nasayran nga nakit-an ang lawas sa biktima duol sa Igbaw Creek human mitaho ang barangay kapitan. Gilusad dayon sa kapulisan ang hot pursuit operation nga miresulta sa pagkadakop sa duha ka suspek didto sa Villanueva, Misamis Oriental.
Sa inisyal nga imbestigasyon, nag-inom ang biktima ug ang iyang mga uyuan hangtod nga miulbo ang panaglalis nga miresulta sa pagpanigbas. Bisan og giangkon sa magulang nga siya lamang ang nitigbas, nasuta sa kapulisan nga adunay “panagkonsababo” (conspiracy) ang duha human nasayran nga mitabang ang manghod pinaagi sa pagtunol sa sundang.
Dugang pa, nakaangkon og ubay-ubay nga samad ang biktima lakip na ang mga defensive wounds sa kamot ug abaga nga nagpakita nga naningkamot pa kini sa pagpanagang. Pasakaan na og tukmang kaso sa piskalya ang mga suspetsado alang sa hustong disposisyon.