Gikinahanglan ang lig-on nga baruganan ug giya sa Korte Suprema kalabot sa pag-tugyan og usa ka indibidwal ngadto sa International Criminal Court (ICC).
Kini ang gibutyag ni Atty. Proculo Sarmen atol sa exclusibong pakighinabi niini sa Bombo Radyo giklaro usab niini nga ang kasamtangang kaso ni kanhi Presidente Rodrigo Duterte anaa pa sa confirmation hearing diin gisusi pa sa mga huwes sa Pre-Trial Chamber kon duna bay igong ebidensya o reasonable grounds aron ipadayon ang pormal nga kaso.
Saysay pa niini nga angay hatagan og katin-awan sa Korte Suprema kon balido ba ubos sa balaod sa nasud ang pag-surrender sa usa ka Pilipino ngadto sa The Hague pinaagi sa warrant sa Interpol nga dili moagi sa lokal nga mga korte.
Gitumbok ni Atty. Sarmen nga kinahanglang masiguro nga dili maabuso ang diskresyon sa bisan kinsang presidente sa pagtugyan og Pilipino ngadto sa langyaw nga korte.
Dugang pa niini kon ugaling ma-dismiss ang kaso karon tungod sa kakuwang sa ebidensya o standard, duna gihapoy posibilidad nga mofile og balik ang mga reklamante, apan kinahanglan kining mosubay sa gitawag nga Rome Statute.
Giklaro usab niini nga importante ang pagsunod sa saktong legal nga proseso sa dili pa arestuhon.