Hugot nga gibawal sa lokal nga kagamhanan sa lungsod sa Maramag ang pag-operate sa mga motorela nga naggunit og temporary issuances o provisionary permits nga wala pa gi-konsidera sa Office of the Municipal Administrator.
Sumala ni Engr. Evelyn Lantong, Acting Municipal Administrator ang mga drayber nga madakpan nga nagoperate gamit ang temporary documents posibleng ma-impound ang ilang unit, mapreso ug pagmulta og P2,500.
Gipasabot ni Engr. Lantong nga ang mga motorela nga nagpadayon sa operasyon bisan walay klarong aprubadong permit, ilabi na kadtong adunay temporary o provisionary issuances, walay legal basihan aron makapadayon sa byahe.
Giawhag usab sa opisyal ang mga drayber nga adunay pending applications nga dili usa mag-operate hangtod makompleto ang proseso sa pagapruba.
Gihatagan sila og dugang panahon aron maproseso ang ilang mga papeles sa Municipal Administrator’s Office.
Ang Traffic Management Team sa lungsod maoy gitahasan sa pagpatuman sa pagdakop ug pag-impound sa mga motorela nga masakpan nga nag-operate nga walay valid permit.