Gihimong dayag sa katawhan ang budget deliberation sa bicameral meeting karong tuiga pinaagi sa pag-live stream niini sa social media.
Tumong niini nga masaksihan direkta sa publiko ang dagan sa diskusyon sa paggahin sa pondo sa gobyerno.Matud ni Atty. Oscar S. Moreno, usa ka law professor ug corporate lawyer, gituyo ang pag-live stream aron mapalig-on ang pagsalig sa katawhan sa gobyerno pinaagi sa usa ka transparent ug klarong proseso sa pag-aprobar sa national budget.
Sumala pa kang Atty. Moreno, ang tuig 2025 mao ang may pinakadakong natala nga insertions sa kasaysayan sa budget deliberation. Iyang gipahayag nga sukad sa tuig 2022 hangtod karon dakong pagsaka ang nakita sa budget alang sa mga proyekto sa Pilipinas.
Gipasabot usab ni Atty. Moreno nga adunay tulo ka nag-unang components ang paggahin og budget sa gobyerno. Una ang Special Appropriation nga gigamit alang sa pagbayad sa utang sa gobyerno.
Ikaduha ang Program Appropriations, nga mao ang pondo nga gituyo alang sa regular nga paggasto ug mga proyekto sa gobyerno.
Ikatulo ang Unprogrammed Appropriation nga nagsilbing standby nga pondo nga gamiton lamang kon adunay kakulangon o emerhensiya.
Pinaagi sa pag-live stream sa bicameral meeting, mamahimong masubay sa publiko ang mga diskusyon ug desisyon sa mga magbabalaod, nga naghatag og higayon sa katawhan nga masabtan ug masuta ang proseso sa pagdumala sa pondo sa nasud.