Gikonsiderar ni Senador Robin Padilla nga isumite sa Bangko Sentral ng Pilipinas (BSP) ang pag-demonetize o pagwagtang sa paggamit sa ₱1,000 banknote isip usa ka lakang batok sa korapsyon.
Ang maong sugyot gikan sa suhestyon ni kanhi Finance Secretary Cesar Purisima, human sa pag-angkon sa mga kanhi opisyal sa DPWH-Bulacan mahitungod sa giingong paghakot sa bilyon-bilyong pisong cash nga gibutang sa mga maleta ug gi-deliver ngadto sa mga mambabalaod nga giingong nangomisyon sa mga flood control projects.
Tungod niini, nagduso si Padilla og Senate Resolution No. 192, nga nag-awhag sa Senado ug sa BSP nga repasuhon ug ikonsiderar ang pag-demonetize sa ₱1,000 banknote nga gi-isyu gikan Enero 1, 2020 hangtod Setyembre 30, 2025.
Gisulti sa resolusyon nga bukas ang maong sugyot sa bisan unsang lakang nga makapalig-on sa transparency, accountability ug bantayan ang paglihok sa kwarta, ilabi na sa mga dako nga denominasyon.
Sumala sa senador, kon mapatuman ang demonetization, mahimong mas lisod alang sa mga nalambigit sa korapsyon ang paghakot ug pagtago sa dagkong kantidad sa kuwarta ug mapugos silang ipadayag ang giingong gikawat nga salapi.
Gihimong sumbanan sa maong resolusyon ang kaparehong lakang sa pipila ka nasud sama sa Singapore, Canada, European Union ug Nigeria isip pamaagi batok sa organized crime ug money laundering