Wala tuguti sa pag-salmot sa transport strike ang mga miyembro sa BUKTRAMCO tungod sa pagsaka sa presyo sa lana. Sa pakighinabi sa Bombo Radyo Malaybalay ni Melvin L. Eredoros, Chairperson sa BUKTRAMCO ug Mindanao Federation Transport Cooperative. Na matod pa gihangyo niya ang mga sakop sa kooperatiba sa Bukidnon, Region 10 ug tibuok Mindanao nga magpadayon sa ilang biyahe aron masiguro ang serbisyo sa katawhan, ilabina kay dili matubag sa welga ang problema sa pagsaka sa presyo sa krudo.
Hinoon, ila kining ipaabot sa mga may kalabutan nga ahensya sama sa Land Transportation Franchising and Regulatory Board (LTFRB), Department of Transportation (DOTr), ug sa Kongreso ug Senado aron matagaan og aksyon.
Gipasabot usab niya nga nasabtan nila ang desisyon ni Ferdinand Marcos Jr. sa pagsuspenso sa fare hike, samtang nanawagan siya sa mga kompanya sa lana nga dili unta pasobrahan ang pagsaka sa presyo aron malikayan ang dugang kabug-at sa mga pasahero ug drayber.
Sa pagkakaron, padayon nga nagdagan ang tanang unit sa BUKTRAMCO buses, samtang nag-andam ang kooperatiba og mga lakang aron maprotektahan ang kita sa mga drayber taliwala sa padayon nga fuel crisis.