Gipunting ni Senator Joel Villanueva nga panahon na gayod aron usabon o amyendahan ang kasamtangang Bank Secrecy Law.
Sa iyang sponsorship speech para sa Senate Bill No. 1728, o ang Banking Reform for Integrity, Good Governance, Honesty and Transparency (BRIGHT) Act, gipasabot ni Villanueva nga ang Pilipinas na lang ang nagpabiling adunay labing estrikto nga balaod sa industriya sa bangko tungod sa Bank Secrecy Law.
Sumala sa senador, maayo ang tumong sa maong balaodnOn aron sa pagpanalipod sa mga tawo nga nagatago sa ilang kwarta sa bangko.
Apan sa paglabay sa panahon, gigamit na matud pa kini sa pipila ka mga nalambigit sa korapsyon.
Tungod niini, dili na masusi sa mga hingtungdan nga ahensya ug bisan sa Kongreso ang ilang mga bank account.
Nagpahimangno si Villanueva nga sa matag tuig dili ma-update ang Bank Secrecy Law, mas nameligro ang nasud nga maapil na usab sa “gray list” sa Financial Action Task Force (FATF). Ang labing maapektuhan niini mao ang mga ordinaryong lungsuranon.