Giklaro ni boxing legend Manny Pacquiao nga dili usa ka exhibition match, kundi usa ka tinuod nga professional fight ang mahitabong rematch tali kaniya ug ni Floyd Mayweather Jr. karong umaabot nga Septyembre 19, 2026, didto sa Las Vegas.
Sa iyang bag-ong pahayag, gipasiugdahan sa “Pambansang Kamao” nga gusto niya ang usa ka opisyal nga dula aron mapamatud-an kung kinsa gayod ang mas maayo sa ring, ilabi na nga daghan ang wala makontento sa resulta sa ilang unang engkwentro niadtong 2015. Matod pa ni Pacquiao, “Dili nako gusto og exhibition match uban niya. Gusto nako og tinuod nga away. Mao kini ang akong gihulat.”
Kini nga katin-awan miabot human nigawas ang mga report nga basin og susama lang kini sa mga miaging exhibition matches ni Mayweather. Apan sumala ni Pacquiao, tungod kay pareho silang mibalik gikan sa retirement ug aktibo gihapon sa pagbansay, angay lamang nga usa ka professionally-sanctioned fight ang mahitabo aron mahatagan og nindot nga salida ang mga boxing fans sa tibuok kalibutan.
Gikatakdang mahitabo ang maong dula sa Sphere sa Las Vegas, nga giisip nga usa sa pinakadakong rematch sa kasaysayan sa boxing.