Mikabat na sa P80 milyon ang damyos sa natigayong flash flood sa Valencia City, Bukidnon. Sa eksklusibong pakighinabi sa Bombo Radyo Malaybalay kang June Ray Arrieta Valero, Head Officer sa Valencia CDRRMO, miluwat kini nga adunay 3,091 ka pamilya o 10,681 ka indibidwal ang apektado sa maong pagbaha.
Sigon niini, nga sa sulod sa usa ka semana gikan sa pagbaha kaniadtong Septyembre 17 ning tuiga, nagpabiling wala pa makit-i ang 3 ka indibidwal.
Sa ika-9 ka adlaw sa retrieval operation, gipaningkamotan sa Valencia CDRRMO, MDRRMO Don Carlos, Kalilangan, Maramag, CDRRMO Malaybalay, Philippine Coast Guard, CDO Oro Rescue, AFP, NIA, PDRRMO, ug REACT group ang pagpangita diin gawas sa 8 ka biktima, 5 pa lamang ka patayng lawas ang nakita.
Samtang, gibanabana nga 564 ka evacuees ang temporaryong naghikling sa city gym.
Apan, masaligon si Valero nga adunay igong ayuda nga gipanghatag gikan sa nagkalain-laing ahensya sa gobyerno, lokal nga kagamhanan, ug stakeholders aron masuportahan ang mga biktima, lakip na ang relief goods ug temporaryong medical assistance alang sa mga evacuees.
Matud usab ni Valero, giandam na sa Mayor ang plano alang sa relocation site sa Barangay Pinatilan diin gihangyo na niini ang national government alang sa mga biktima nga nawad-an ug panimalay.
Samtang padayon pa ang validation sa mga partially damaged ug submerged houses aron lakip kini sa relocation program ug masiguro nga makabaton og mas luwas nga dapit ang mga naapektuhan.