Gitutokan karon sa lokal nga kagamhanan sa syudad sa Malaybalay ang mas lig-on ug malungtarong pagpalambo sa sektor sa agrikultura.
Sa pakighinabi sa Bombo Radyo Malaybalay kang Engr. Richard Leono, City Agriculturist sa Malaybalay, gibutyag niini nga mukabat sa kapin o kulang P62 milyon ang pondo nga gitagana sa syudad alang sa lain-laing programa ug proyekto nga mosuporta sa mga mag-uuma.
Lakip niini ang pagpalit ug pag-apod-apod sa mga binhi ug seedlings nga planong ipanghatag sa mga benepisyaryo karong umaabot nga bulan sa Marso ning tuiga.
Gipaniguro usab sa lokal nga kagamhanan sa syudad sa Malaybalay nga padayon ang paningkamot aron matabangan ang mga mag-uuma nga naapektohan sa miaging mga kalamidad ug katalagman.
Matud ni Engr. Leono, nagtunol ang syudad og pinansyal nga tabang nga mokabat sa P5,000 matag hektarya alang sa mga mag-uuma nga kaniadto naapektohan sa kalamidad.
Dugang pa niini, pinaagi sa hiniusang paningkamot sa buhatan sa agrikultura ug sa lokal nga kagamhanan, gipasigarbo nga hinay-hinay nang nakarekober ang mga mag-uuma ug nagbalik na sa normal ang panginabuhian.