Gipasigarbo ni Presidente Ferdinand Marcos Jr. nga dili maduguon o “bloodless” ang kampanya batok sa ilegal nga droga, human nasakmit ang kapin P62 bilyon nga kantidad sa shabu sulod sa tulo ka tuig.
Kahinumduman nga ang labing dako nga nasakmit sa mga otoridad adunay gibug-aton nga 1,304 ka kilo nga shabu nga gibana-banaang nagkantidad og P8.871 bilyon nga nasakmit sa mga mananagat duol sa baybayon sa Central Luzon, Ilocos, ug Cagayan Valley.
Subay niini, gimando usab sa Presidente ang dali nga pagbungkag sa mga nasakmit nga droga aron malikayan ang posibleng pagbaligya niini pag-usab.
Ang maong droga nga gitipigan sa PDEA headquarters sa Quezon City, gisunog na karong adlawa sa usa ka pasilidad sa Capas, Tarlac, nga gitambungan usab sa presidente.
Lakip usab sa gisunog mao ang 226 ka kilo nga lain-laing klase sa ilegal nga droga nga nagkantidad og P609 milyon, nga nakuha gikan sa laing mga operasyon ug giaprubahan na sa korte alang sa pagdaob niini aron dili na kini mapahimuslan pa.