Gibutyag ni Ombudsman Jesus Crispin “Boying” Remulla nga posibleng mukabat sa ₱600 bilyon ang nangakuwang o nalugi sa gobyerno gumikan sa pag-atras sa pagproseso sa mga kaso sa iyang opisina.
Matud ni Remulla, kasamtangan pang ginasusi ang hinungdan niini, ug gituohan nga resulta kini sa “inordinate delays” o sobra ka dugay nga pagproseso sa mga kaso. Gisiguro usab niini nga masusi ug mapamatud-an ang tukmang kantidad nga nawala sa pondo.
Giangkon usab sa Ombudsman nga angay kabalak-an kini nga sitwasyon, apan nagpasalig kini nga balikan ug susihon pag-ayo ang mga kaso aron maklaro ang kinatibuk-ang pagkalugi sa gobyerno nga milabaw sa tunga sa trilyon pesos.
Tungod niini, gisugdan ni Remulla ang kampanya sa “digitalization” sa Office of the Ombudsman aron mapadali ang pagproseso sa mga reklamo ug kaso.
Matud pa, pinaagi sa modernisasyon, mas dali nilang matutukan ang mga isyu ug malikayan ang dugay nga pagkaatras sa hustisya.