Mukabat sa kapin P5.4 milyon nga kantidad sa nagkalain-laing kontrabando ang nakumpiska samtang 165 ka indibidwal ang naaresto sa sunod-sunod nga operasyon sa Police Regional Office 10 sulod lamang sa usa ka semana, gikan Enero 16 hangtod Enero 22, 2026.
Lakip sa gipahigayon ang 55 ka anti-illegal drugs operations nga miresulta sa pagdakop sa 66 ka indibidwal ug pagkakumpiska sa 348.291 gramos sa shabu ug 0.5 gramos sa dahon sa marijuana, nga adunay kinatibuk-ang kantidad sa P2,368,438.80.
Aduna usab 13 ka operasyon batok sa illegal nga sugal nga miresulta sa pag-aresto sa 24 ka indibidwal ug pagkakumpiska sa P8,101 nga paraphernalia.
Sa kampanya batok sa mga wanted person, 56 ka persona ang nadakpan lakip ang 14 ka Most Wanted Persons ug 42 ka Other Wanted Persons.
Samtang, sa kampanya kontra loose firearms, adunay 16 ka operasyon ang gihimo nga miresulta sa pagdakop sa walo ka indibidwal ug pagkarekober, pagkakumpiska ug boluntaryong pagsurender sa 15 ka armas.
Aduna usab siyam ka operasyon batok sa illegal nga pagmina nga miresulta sa pagkakumpiska sa P56,470 mga gamit.
Sa kampanya kontra smuggled nga sigarilyo, adunay 11 ka indibidwal ang nasikop ug pagkakumpiska sa kontrabando nga sigarilyo nga nagkantidad og P3,045,840.